巴士（同少部分其他交通）: [實測考古] 惠東 701 路：撲索迷離嘅「黃牌」宇通 E7

話說之前喺龍崗因為完全搵唔到車過惠東，最後被迫直接 Call 車過多祝，所以出發前無機會證實 AI 話「相對落後」嘅惠東鄉鎮有無柴油巴士去鄉鎮。

點知喺多祝搵食途中，真係見到大量「村村通」小巴，車身寫住「純電動公交」，但又好似以前東莞巴士咁貼住大貼紙顯示路線，望落確實幾殘。按道理電車應該係新淨嘢，但呢批車偏偏有一種「經典舊樣」嘅強烈違和感。最神奇係後轆表面望落同前轆好似，究竟我有無機會試到呢啲特別物種？

點知第二日去完民宿，退房之後要同朋友去增光探姨媽，結果完全 Call 唔到車，真係要行返出去多祝公交站上車。第一次上到呢部粵L·01200。

2026-04-25

多祝公交站 1：57PM

司機位隔離個鼓包位座椅殘到剩返個框架，軟墊消失咗。我當時喺度諗：既然車頭貼住純電動，點解會掛住傳統嘅黃色車牌？架車殘成咁，真係一架電動車？ 竟然仲可以玩到今時今日變埋戰損版，果然骨子裡都係一架村村通啊！

2：06PM 增光路口

🛠️ 硬核拆解：實測後嘅型號考證

當時喺現場見到車尾，只係知道佢係 E7。但根據常識，好似比亞迪 K8、K9 背後都有一串好長嘅型號一樣，「E7」背後一定大有文章。返到去之後，我花咗一段時間翻查國家批核型號，最後終於喺「巴士檔案站 (Buspedia)」證實，呢款其實係宇通 ZK6701BEVG3，係 2014 年就投入生產嘅原始純電舊版。

1.驅動技術嘅真相：

呢款 2014 年原始版雖然驟眼睇後轆好似同前轆對稱，容易誤導以為係新一代嘅電驅橋，但細心睇返我影低嘅相再對比正式型號資料，其實前後輪圓心位置有分別，依然係有傳統驅動軸結構，只係外觀隱藏得比較好。再加上 2023 年新版「宇暢」E7 係採用低入口設計，外貌比較似一架巴士縮短版，而呢架保留咗傳統二級踏步，所以一定係舊車。

2.空間與配重嘅「撲朔迷離」：

呢架車真正魔幻嘅係佢嘅「分散式電池佈局」。司機位隔離有巨大鼓包安置電池同電控，但車尾又有一級後山。這種「前面高一級、後面又有一級」嘅佈局，反映咗廠方喺一個原本屬於燃油村村通嘅狹窄框架內，為咗平衡配重同埋塞入續航電池，而做出嘅極端結構妥協。

3.身份嘅特殊價值：

喺 2026 年嘅今日，呢架 2014 年嘅第一代電動巴士，比起一架新嘅柴油巴士，身份反而更為特別——佢紀錄咗電動化初期嗰份野性同埋結構上嘅各種妥協。

夜晚返到多祝又見到

7：15PM 多祝公交總站

💰 營運觀察：二維碼係「現金」，唔係「卡」

呢度嘅營運邏輯同城市完全唔同，交通卡機使用率極低，因為呢度嘅乘車碼唔係內置喺交通卡機入面。起步 ¥2，多祝去增光要 ¥3，全程搭到去平山要 ¥8。主角係車頭貼住嘅一個「收錢吧」收款碼，支援微信、支付寶同銀聯閃付。最正係唔需要開同行碼功能，都可以一次過幫同行人士俾錢（因為唔係個個朋友都有網絡，不過當地人多數自己俾自己）。但代價係呢種支付邏輯係「電子現金」，所以完全唔享有任何交通卡補貼。

第二次乘搭係食完炒河、拎住一堆行李想 Call 車返蓮塘，結果高德完全無車，唯有行返去多祝總站上車。今次上咗部保養比較正常嘅粵L·01248。雖然有報站，不過車廂入面充滿咗客家話：「有下，司機！」（增光附近）或者「司機，有落！」（近平山）。既然可以隨時落車，咁上車應該無問題。咁就明白點解一日前去增光探朋友姨媽遲到，表姐會話：「你係咪喺香港太耐啊？見到車就可以上啦，使乜特登行去巴士站，搞到依家先到！」

走廊寬闊，可以俾乘客放行李