由布院之森以外嘅啟發：九州高速巴士不高速

今次去由布院，原本一早買定「由布院之森」回程，但去程諗住搭其他交通工具比較下。3月21號一落機去博多，諗住買3月24號去由布院嘅火車同直達巴士，點知全線爆滿！我哋被迫揀咗去日田轉車。買飛嗰陣，乘務員話車票「只有日期限制，無班次限制」，排隊就上得。聽落好似好「頹」，暗示呢條係名不經傳嘅偏遠路線。

【第一章：日田線 —— 觀光 SHD 老將的第二春】

1.  坐中新車？

為咗穩定行程，我哋預先執咗兩張3月24日去日田嘅「ひた号」車票。正當心理準備會係殘舊老車之際，結果9：57上車，見到嘅竟然係一部換咗最新 Harmony 白色塗裝嘅 三菱 Aero Queen (3244 | QTG-MS96VP)。

上車嗰陣司機位咁啱無人，我趁機影咗一張司機位嘅相。你可以見到嗰種 SHD（Super High Decker）特有嘅高挑視野，加上極之新淨嘅保養，令我一時間以為自己中咗大獎，坐中 2025 年新車。

2. 「2020 年代」嘅現代感：移籍與重生

呢部 3244 號車嘅原身係福岡衛星城市「二日市」嘅豪華觀光租車。佢由以前每日接載遊客環遊九州，到依家變到每日跑固定路線。

因為佢係喺 2021 年疫情期間先正式「移籍」轉型，所以車上面嘅 白色 LED 行先 同埋 USB 充電口 全部係 2020 年代新加裝。配合埋本身就維持得好好嘅座椅質感，佢展現出嚟嘅現代感，竟然比好多原裝嘅高速巴士仲要重。

除咗 USB，仲有一個位可以睇出西鐵嘅細心。因為呢部三菱原身係觀光車，天花板冷氣口係冇內置落車鐘嘅。西鐵移籍嗰陣，特登將落車鐘裝喺窗邊 USB 隔離。呢個「後加」嘅動作，反而令乘客唔使抬高隻手就撳到，除咗方便之外，亦從側影突顯出佢原本觀光車嘅特殊身分。

但之後查返資料我先驚覺，呢架豪華車原來係 2017 年出廠。喺現場睇，我真係以為自己坐緊 2025 年最新車輛。畢竟有啲經典型號可以好長青（好似三菱Rosa 都出咗幾十年），如果唔係特登去查，單憑呢份「凍齡」質感，真係會以為佢係啱啱落地嘅新車。

3. 誤判「天神」：由轉車站變身超級總站

當巴士駛向「天神」嗰陣，原本我以為呢度只係一個好似普通公路站咁嘅名，所以我特別開住相機諗住影下呢段行車片：

日田巴士三菱Aero Queen (QTG-MS96VP) 3244号車（大分200か1110）博多高速巴士總站→西鐵天神高速巴士總站

https://youtu.be/zkMAJgz_70g?si=ZmCE0OmdxfW1qe6S

點知巴士行極都係市區，最後竟然直接駛入一座大型建築物——西鐵天神高速巴士總站。無錯，就係有 Parco 嗰個天神啊！睇住塊報站屏幕顯示呢個總站名，我先發現自己完全低估咗西鐵嘅營運規模。雖然係由高速落返市區行一段路，但成個總站實際上係喺「三越百貨」嘅上蓋，而且仲有極之發達嘅室內連接橋穿過多個商場直達 Parco。雖然經過市區，但進出總站嘅流程仍然好合理，完全符合大眾對「公路/高速巴士」應有嘅專業認知。

4. 二日市嘅身分烙印：抹除得徹底，轉換得專業

當巴士駛上都市高速，屏幕跳出「筑紫野二日市溫泉入口」嗰陣，我真係好有感觸。二日市係「西鐵觀光」嘅大本營，亦係呢部 3244 號車以前做觀光時代嘅「老家」。以前佢係載住旅行團周遊九州，依家移籍過嚟跑高速巴士。

雖然對日本巴士嚟講，裝個報站屏幕係基本動作，但睇住呢塊寫住「二日市」嘅屏幕，你就會發現西鐵嘅整備係「抹除得好徹底」。佢唔係「路過」二日市嘅客人，而係繼續成為呢區營運體系入面嘅一份子。呢種身分轉換嘅「韌性」，比起單純睇佢係咪新車更加有趣。

5. 「茲柔」嘅文化衝擊：500 匹馬力嘅封印

呢部三菱 Aero Queen 配備咗 ShiftPilot 8速 AMT，體感極之穩定舒適，但九州司機嘅風格非常「茲柔」。

雖然喺市區停多幾個站係全球高速巴士嘅「正常操作」，但一出到公路，九州呢種「見出口就入交流道/休息站」嘅頻率就真係未必係常態。佢哋嘅邏輯係將高速公路當成公車路咁行，見站就入。結果我哋 09:57 上車，11:54 先到日田。睇住架 500 匹馬力嘅怪獸，被封印喺呢種「公路公車化」嘅慢爬入面，企喺巴迷角度睇，真心覺得「用唔盡架車」！

【第二章：天神站的「漢字啟發」與預購迷思】

其實我哋原本就計劃咗幾日後去佐賀玩，只係一直未諗定搭咩車。直到喺日田線入天神總站嗰陣，望向窗外見到對面線跳出「佐賀」兩個大漢字，即刻得到啟發——買高速巴士飛！

3月24號晚返博多，靈機一動去售票處預買去佐賀嘅車票。當時以為佐賀係熱門線路，一定要「預定」班次，於是先去搵乘務員攞時間表研究，應該有三個班次比較適合，分別係 9:13、9:43 同 10:13。點知去到售票機一睇，張飛同日田線一樣係無顯示時間。原來「只買日期、唔買時間」係九州特色，類似火車嘅「自由席」。

【第三章：三日後實測 —— 佐賀線的終極答案】

三日後，我哋瞓到自然醒，原本諗住去到車站先買嘢食。雖然一早買咗飛，但因為去到車站時間太忟，喺完全無時間入 Starbucks 買杯咖啡食個包嘅情況下，最後只能夠搭到比預期更遲嘅下一班 10:43 班次。

嚟接我哋嘅係一架 五十鈴 Gala（編號 2905）。呢架 2015 年嘅車，落斜會聽到車窗震動嘅雜音，更顯老舊。成段路有兩個地點起步好有爆發力：分別係天神高速巴士站落斜出天神，同埋天神北上收費站匯入都市高速嗰下。嗰兩下推背感一度令我對呢部舊車增加咗唔少期望。

* 設備嘅代差與現實嘅無奈： 今次旅程無 USB 充電口，只有日本標準兩腳插頭。摸住個肚，我再次感受到「裝備再好都敵唔過日本規格」嘅無奈。

* 起步爆發與時間跳遲： 可惜起步爆發只係瞬間，一上公路依然係塞車。坐喺前排，望住報站機連整理券收費顯示，見到愈嚟愈多站，代表仲要經過幾個唔同地面嘅高速休息站（按照經驗係必入）。再望向司機位個報站機控制器，見到上面個預計到達時間因為塞車而不斷向後跳，睇住資訊同步更新，嗰種無力感真係好強。最後 10:43 上車，11:55 先到佐賀。

【結語：日韓之間嘅「極致」對比】

呢兩程車令我明白日本巴士係「抽盲盒」。可以有前身係租車嘅豪華巴士，都可以搭中 2015 年嘅 Gala 喺天神北衝刺……

對於好多會一次過玩埋釜山同福岡嘅香港遊客嚟講，呢種衝擊尤其大。釜山嘅高速巴士係「效率嘅極致」，上咗公路就係直達，最多兩邊城市市區部分多啲站；而九州嘅高速巴士係「服務嘅極致」，將「公路公車化」做到最盡。呢個反差正正呼應咗開頭嗰句：原來喺九州可以體驗到「高速巴士不高速」。

雖然行得慢，但呢種睇住 LED 地點、學識搭車嘅自由度，加上抽盲盒咁嘅車型驚喜，確實係跟一般遊客路線畀唔到你嘅樂趣！

------------------------------

下一篇我哋再講：喺日田站轉乘「紅色 200DC 火車」，聽下嗰陣同巴士一模一樣嘅柴油咆哮聲！